Afrika qit’asidagi Jibuti davlati Eron bilan diplomatik aloqalarni uzganini ma’lum qildi. Bu haqda “Vedomosti” xabar bermoqda.
Respublika tashqi ishlar vaziri Mahamud Ali Yussufning ta’kidlashicha, bu orqali uning mamlakati Saudiya Arabistoni bilan hamfikr ekanligini namoyish etishga qaror qilgan.
Eslatib o‘tamiz, Saudiya Arabistoni tashqi ishlar vazirligi 2-yanvar kuni terrorizm va fitna uchun sudlangan 47 kishi, shu jumladan, shialar xatibi Nimr an-Nimrga nisbatan o‘lim hukmi ijro etilganini e’lon qilgan edi. Shundan so‘ng Tehronda namoyishchilar Saudiya Arabistoni elchixonasiga hujum qildi.
Ushbu hodisadan so‘ng avvaliga Saudiya Arabistoni, keyin esa Sudan va Bahrayn Eron bilan diplomatik aloqalarni uzdi. BAA esa Tehron bilan diplomatik aloqalar darajasini pasaytirdi.
