Rossiya poytaxti Moskva shahridagi Markaziy kinochilar uyida 18-yanvar kuni o‘zbekistonlik taniqli rejissor Shuhrat Abbosovning 85 yoshga to‘lishi munosabati bilan yubiley kechasi o‘tkazildi. Bu haqda “Darakchi” gazetasi xabar bermoqda.
Tadbir Kinematografistlar uyushmasi, Rossiya kinoaktyorlar gildiyasi ko‘magida tashkil qilindi. “Shu kuni sahnada kino va shou-biznes sohasining eng mashhur vakillari o‘zbek rejissorini qutladi”, — deb yozadi gazeta.
O‘zbekiston xalq artisti, rejissor Shuhrat Abbosov 16-yanvar kuni 85 yoshga to‘ldi. U “Mahallada duv-duv gap” (1960), “Sen yetim emassan” (1962), “Toshkent — non shahri” (1967), “Otamdan qolgan dalalar” (1997) kabi filmlarni suratga olgan, “Shum bola” (1977) filmida ssenariy muallifi sifatida qatnashgan.
