Stanislavskiy va Nemirovich-Danchenko nomidagi Moskva akademik musiqiy teatri solisti Najmiddin Mavlonov 11-yanvar kuni Londonning “Kovent-Garden” Qirollik teatrida Puchchinining “Toska” operasida Kavaradossi partiyasi bilan birinchi marta chiqish qildi. Bu haqda solistning “VKontakte” ijtimoiy tarmog‘idagi sahifasida aytiladi.
Mavlonov ushbu rolida mazkur teatr sahnasida 25, 29-yanvar hamda 2-fevral kunlari ham chiqish qildi. Opera 5-fevral kuni ham taqdim etiladi.
Xonanda Nasiba Abdullayeva Facebook’dagi sahifasida operadan keyin Najmiddin Mavlonov bilan tushgan suratlarini e’lon qildi va uning ijrosiga tasanno aytib, u bilan faxrlanishini ta’kidladi.
Najmiddin Mavlonov 2008-yilda Toshkent davlat konservatoriyasini bitirgan. 2003—2010-yillarda Alisher Navoiy nomidagi Toshkent davlat opera va balet akademik teatri solisti bo‘lib ishlagan. Stanislavskiy va Nemirovich-Danchenko nomidagi Moskva akademik musiqiy teatriga 2010-yilda ishga o‘tgan. Ko‘pgina xalqaro tanlovlar g‘olibi.
