Yuray desa adashadi yo’llaridan,
Birov bir bor tutay demas qo’llaridan,
Gar gapirsa oh otilar tillaridan,
Boshi egik, qaddi bukik Kumushbibi.
Aytay desa tinglamaslar dardlarini,
To’kay desa eshitmaslar hasratini,
Darlardiga qachon topar hamdardini,
Boshi egik, qaddi bukik Kumushbibi.
Olloh o’zi asrasin der har ohida,
Yomonlardan saqla deydi panohida,
Yaxshilarga dars bo’ladi u gohida,
Boshi egik, qaddi bukik Kumushbibi.
Hayron qolar, goh u dunyo ishlaridan,
Bezor bo’lar o’z-o’zini tashvishidan,
Hatto do’sti chiqargan mish-mishlaridan,
Boshi egik, qaddi bukik Kumushbibi.
Gunohiga yetmagaydir savoblari,
Har qadamda uchragaydir saroblari,
O’z domiga tortar azob girdoblari,
Boshi egik, qaddi bukik Kumushbibi.
Dilda to’la orzudan ko’p armonlari,
Bardoshiga yetmagaydir darmonlari,
Topilmaydi yo’l ko’rsatar sarbonlari,
Boshi egik, qaddi bukik Kumushbibi.
Otabekin izlay-izlay ko’zlar giryon,
Xayollari uchib yurar har on har yon,
Yo’llarida ag’yori ko’p tili biyron,
Boshi egik, qaddi bukik Kumushbibi.
Olloh o’zi to’g’ri yo’lga bir kun solar,
Dardlaringni qoldirmayin bir-bir olar,
Qalbdan armon ketib orzu, umid qolar,
Boshing ko’tar, qadding tik tut Kumushbibi!
