Inson padar deb bilgan,
Odamga o'xsha o'g'lim.
O'ksik dilim qil baland,
Otamga o'xsha o'g'lim.

Do'stu dushman oldida,
Ko'tarib qo'ygin ko'nglim.
Otam umidi sendan,
Otamga o'xsha o'g'lim.

Yaxshi yomon kunimga,
Menku chidadim ko'ndim.
Otamdek yet qadrimga,
Otamga o'xsha o'g'lim.

Kim bo'lsang ham halol bo'l,
Sendadir mening yo'lim.
Qonzanjiring toza bil,
Otamga o'xsha o'g'lim.

Otamdek tushunmagan,
Meni qalbimni hech kim.
Hech kimim yo'q bilasan,
Otamga o'xsha o'g'lim.

Yillab so'ramaysan hol,
Mendan balandmi ilm.
Onangni qilmagin xor,
Otamga o'xsha o'g'lim.

Yaxshi niyatla senga,
Otam ismini qo'ydim.
Qaytar, otamni menga,
Otamga o'xsha o'g'lim.

Nokaslarning jabridan,
O'g'lim, charchadim to'ydim.
Nur yog'ilsin qabridan,
Otamga o'xsha o'g'lim.

Do'stdan pand yeyaverib,
Uzilib ketdi qo'lim,
Kul bo'ldim kuyaverib,
Otamga o'xsha o'g'lim.

Otam niyat qilgandek,
Munosib yasha o'g'lim,
Yonimda tirgak bo'l tik,
Otamga o'xsha o'g'lim.

Inson padar deb bilgan,
Odamga o'xsha o'g'lim.
O'ksik dilim qil baland,
Otamga o'xsha o'g'lim.

Ahad Qayum